封城期間 - 6 個對你和子女有效的在家學習建議

我哋知道好多在英國生活嘅家長，對於子女要在家學習嘅情況面對多好多挑戰，所以我哋今次希望同大家分享六個有助大家 Homeschooling 嘅建議

1. 每朝起身做早操

身體健康最緊要，英國嘅冬天起身就算開咗暖氣都好凍，食早餐之前其實可以同個小朋友一齊做熱身運動，除咗叫醒身體唔同嘅器官之外仲叫醒埋個大腦，食個豐富嘅早餐都容易吸收啲。每朝早跟住英國健身達人 Joe Wicks YouTube 頻道 The Body Coach TV 做半個鐘頭運動。

www.youtube.com/c/TheBodyCoachTV

2. 放心讓小朋友網上學習

小朋友的吸收能力快，佢哋都要與時並進。市場上其實有好多為咗小朋友自我學習而設計嘅網頁同APPS。花少少時間去搵一啲適合小朋友程度嘅去比佢哋玩住嚟學習啦。佢哋安心網上學習嘅時候你又有時間做自己嘢。

3. 專注於核心科目(數學和英文)，同埋睇多啲書

個個都係家長不過唔係個個都係老師，所以唔好定一個老師先至做到嘅目標。專注於核心科目例如數學同英文，總好過包攬晒成個課程內容，變相大家都辛苦。早上襯佢哋嘅頭腦清醒最好教佢哋數學同埋英文，下晝就教其他科目或戶外學習。佢哋總會有其他途徑學習其他課程裏面嘅內容。英國就好着重學生自己睇書，係呢個時候不妨同佢地一齊睇多啲書，唔同嘅書本內容都係令佢哋吸收知識嘅來源。

4. 不要讓環境令到你成為怪獸家長

小朋友在家學習係一個挑戰，家長在家教小朋友學習是一個艱巨嘅任務。跟住個時間表做到當然係最美好，實際上總有其他事情發生，完成唔到唔需要灰心。記住你哋都係一齊面對緊新嘅環境。小朋友相對大人嘅專注率會比較低，最好校個鬧鐘，設定每一節為25分鐘，鬧鐘響左之後一齊放一個10分鐘嘅小息啦。

5. 講出事實是最好的解決方法

未必每個子女都明白點解冇得返學，點解父母變咗老師喺屋企上堂，點解父母嘅教學方法同老師有咁大分別，點解冇得見佢啲同學同埋朋友仔。直接同佢哋簡單咁解釋佢哋咁多嘅點解，令佢哋明白到係乜嘢原因令到要咁樣做，子女多了解就更加可以明白父母嘅情況。家長於屋企上堂方面如果有疑問同埋困難，記得多啲同老師聯絡，佢哋始終係專業人士可以有好好嘅意見比到你地。

6. 給予子女和自己多啲肯定

努力嘗試當玩咁去同子女上堂，你會發現事半功倍。所有嘅家長都係有限嘅時間同空間裏面，設立一間為子女特製嘅學校出嚟，不如叫子女一齊去建立呢間家庭學校啦。同佢地一齊諗吓個學校名，設計下學校嘅校徽。做得好記得比星星呀以示獎勵。如果子女今日做唔晒啲功課，真係唔使逼佢地做晒佢。因為學校老師都提及過呢啲功課有部份係富有挑戰性嘅，解決唔到係好正常。週末如果有時間咪挑戰埋佢囉。最後記得用個大File集齊晒子女做好嘅功課，當大家做到好辛苦嘅時候攞出嚟睇吓你哋嘅成績，會係一個好好嘅支持。